har ek shakl men surat na.i malal ki hai
hamare charon taraf raushni malal ki hai
ham apne hijr men tera visal dekhte hain
yahi ḳhushi ki hai sa.at, yahi malal ki hai
hamare ḳhana-e-dil men nahin hai kya kya kuchh
ye aur baat ki har shai isi malal ki hai
abhi se shauq ki azurdagi ka ranj na kar
ki dil ko taab ḳhushi ki na thi malal ki hai
kisi ka ranj ho, apna samajhne lagte hain
vabal-e-jan ye kushada-dili malal ki hai
nahin hai ḳhvahish-e-asudgi-e-vasl hamen
javaz-e-ishq to bas tishnagi malal ki hai
guzishta raat ka.i baar dil ne ham se kaha
ki ho na ho ye ghuTan aḳhiri malal ki hai
ragon men chiḳhta phirta hai ek sail-e-junun
agarche lahje men sha.istagi malal ki hai
ajiib hota hai ehsas ka talavvun bhi
abhi ḳhushi ki ḳhushi thii, abhi malal ki hai
ye kis umiid pe chalne lagi hai bad-e-murad?
ḳhabar nahin hai use, ye ghaḌi malal ki hai
dua karo ki rahe darmiyan ye be-suḳhani
ki guftugu men to be-pardagi malal ki hai
tiri ghazal men ajab kaif hai magar ‘irfan’
darun-e-ramz-o-kinaya kami malal ki hai
Leave a Reply