Meer Asar
kar ke dil ko shikar ankhon men
ghar kare hai tu yaar ankhon men
chashm-e-bad duur ho nazar na kahin
hai nipaT hi bahar ankhon men
aur sab chehra-baziyon ke siva
ishva hai sad-hazar ankhon men
kya kahun kuchh kahi nahin jaati
baten hain be-shumar ankhon men
jis ghaḌi ghurte ho ghussa se
nikle paḌta hai pyaar ankhon men
tir-e-mizhgan dilon ke paar hue
hai ye guzar o guzar ankhon men
yaar tere liye ye gauhar-e-ashk
the bara-e-nisar ankhon men
ashk-e-ḳhunin ke ye nahin qatre
ye rahe hain sharar ankhon men
dekhna Tuk ‘asar’ se nazren mila
kya hue the qarar ankhon men
Leave a Reply