Seema Naqvi
paḌ ga.e kyon mere pichhe hain ajab ustad ji
aa ga.e tashih karne be-sabab ustad ji
chand chehre ko ghaTa zulfon ko kahte hain miri
saare Tharki ashiqon men hain ghazab ustad ji
matl.a se maqta talak saari ghazal tharra uThe
aa.en jab mujh ko sikhane she.ri Dhab ustad ji
un ko batla do jalana paḌta hai ḳhun-e-jigar
yunhi ban jaate nahin hain sab ke sab ustad ji
ji men aata hai ki main sar phoḌ luun divar se
apne hi ash.ar likhvate hain jab ustad ji
koi to aa kar nikale un ke changul se mujhe
mujh ko pagal kar rahe hain roz-o-shab ustad ji
ehtiram un ka hai vajib mujh pe lekin kya kahun
mujh si ahqar ke liye hain be-adab ustad ji
jaane kab mil jaa.e mujh se bhi zahin ik sha.era
mujh ko tanha chhoḌ jaa.en jaane kab ustad ji
sach kahun assi ke piThe men bhi lagte hain javan
hain hasinon men hi kyon phir jan-ba-lab ustad ji
haan magar kuchh dost aise hain bahut dil ke qarin
jin se mil kar yuun lage hai sirf rab ustad ji
jab se likhi hai ghazal ‘sima’ ḳhafa hain jaane kyon
Dar hai raazi ho na jaa.en phir se ab ustad ji
Leave a Reply