phir qissa-e-shab likh dene ke ye dil halat bana.e hai
har sher hamara aḳhir ko teri hi baat bana.e hai
tum ko hai bahut inkar to tum bhi is ki taraf ja kar dekho
vo shaḳhs amavas raat ko kaise chandni raat bana.e hai
ab ḳhvab men bhi us zalim ko bas hijr ka sauda rahta hai
ai jazba-e-dil tu kis ke liye ye phuul aur paat bana.e hai
kya hosh-o-ḳhirad kya harf-o-nava sab apne liye bekar hue
qirtas-e-nazar par tanha.i biite lamhat bana.e hai
har baar vahi hijran hijran ka shor machane vaala dil
apni hi kare hai rishta-e-gham tere hi saat bana.e hai
kya janiye ab ke mausam men kab vaqt ke ji men kya aa.e
kis ki auqat bigaḌe hai kis ki auqat bana.e hai
ye tera divana raat ga.e malum nahin kyuun pahron tak
aansu ki lakiron se kitne naqsh-e-jazbat bana.e hai
Leave a Reply