Poet
hairan huun nasib ki baḳhshish ko dekh kar
saa.e se apne dhuup men mahrum hain shajar
qabze men apne hoti fazaon ki mamlikat
uḌte agar havaon ki raftar dekh kar
un se mile to ḳhud se bhi pahchan ho ga.i
varna ham apni zaat se ab tak the be-ḳhabar
har TukḌe men bas ek hi tasvir paoge
dekho to apni zaat ka a.ina toḌ kar
nashtar se log karte hain zaḳhm-e-jigar rafu
ye rasm to kahan se chali mere charagar
‘anjum’ zamin se jin ki jaḌen rishta toḌ len
dekha hai sab ne suukh ke girte hain vo shajar
Leave a Reply