vo bhi bigḌa, hui rusva.i bhi
jan-leva hai shanasa.i bhi
dil ki janib jo chali gham ki hava
laḌkhaḌane lagi tanha.i bhi
tha muqabil jo mire dost mira
mujh ko achchhi lagi paspa.i bhi
kyuun uThate ho hamin hote hain
har tamashe men tamasha.i bhi
chandni haath pe rakh kar shab ne
ek surat mujhe dikhla.i bhi
‘sad’ kuchh bhi na bane gar tujh se
ek surat hai shakeba.i bhi
Leave a Reply