Ashfaq Husain
sukun-e-dil ki ḳhatir ik sahara DhunDte hain
jo gardish men nahin hai vo sitara DhunDte hain
abhi to tujh se vabasta hain pichhle zaḳhm saare
shab-e-rafta tujhe ham kyuun dobara DhunDte hain
koi ghar hi nahin to be-ghari ka zaḳhm kaisa
sukunat ke liye ik isti.ara DhunDte hain
zamin achchhi lagi hai asman par ja ke ham ko
kahan hai is zamin par ghar hamara DhunDte hain
ye dariya zindagi ka paar kaise ho ki jab ham
kinare par khaḌe hain aur kinara DhunDte hain
hamari ḳhvahish-e-be-ḳhvahishi jo raakh kar de
ham apni shaḳhsiyat men vo sharara DhunDte hain
kisi mahtab ko qadmon men le aane se pahle
ham un ankhon ka halka sa ishara DhunDte hain
Leave a Reply