ham bura karte ya bhala karte
soch kar koi faisla karte
tum ta.alluq ka paas to rakhte
ḳhush na karte hamen ḳhafa karte
dosto kaash dukh ke lamhon men
tum dava karte ham dua karte
kar di dushvar rahguzar-e-zist
aur kya kaam rahnuma karte
rakhte rishton men yuun tavazun ham
kuchh vafa karte kuchh jafa karte
sar uThate qubuliyat ke ba.ad
sajda-e-shauq yuun ada karte
baat thi jab ki but-kade men ‘obaid’
baiTh kar tum ḳhuda ḳhuda karte
Leave a Reply