ḳhush-adaon se bas allah bacha.e dil ko
ki bana lete hain apna ye para.e dil ko
ishq asan nahin ai jaan baḌa mushkil hai
jaan de de magar insan na laga.e dil ko
ye vo muztar hai ki Thahra hai na Thahrega kabhi
laakh muTThi men koi apne daba.e dil ko
nigah-e-yar bhi hai taak men andaz bhi hai
in luTeron se bas allah bacha.e dil ko
haath us gauhar-e-ḳhubi ke hai beḌa ‘sabir’
bahr-e-ulfat men Duba.e ya tira.e dil ko
Leave a Reply