Arpit Sharma Arpit
hai jaise roz divali si duniya duniya valon ki
hamen bhi chaar din ki zindagi milti ujalon ki
juda gham hai juda ḳhushiyan juda din hai juda raten
ye duniya hi nirali hai mohabbat karne valon ki
zamana ḳhubsurat hai zamane men hasin lakhon
magar tasvir to tum ho mire ḳhvabon ḳhayalon ki
kabhi tark-e-mohabbat tum karo socha na tha main ne
bhula di ek din hi men mohabbat tum ne salon ki
zamane ke varaq par ab likhunga dastan-e-gham
zaban bhi aa ga.i mujh ko kitabon ki risalon ki
chhupa kar ek a.ina rakha hai main ne bhi dil men
kabhi tasvir le lunga sabhi main husn valon ki
javab is ka sahi dega koi to is ko kholunga
bana kar ek gaThri main ne rakhi hai savalon ki
safar men zindagi ke ham ne ye dekha hai ai ‘arpit’
zarurat paḌ hi jaati hai kabhi sukhe nivalon ki
Leave a Reply