Zafar Ansari Zafar
jab bhi maazi ke nazare ko nazar ja.egi
shaam ashkon ke sitaron se sanvar ja.egi
kya bata.un ki kahan tak ye nazar ja.egi
ek din hadd-e-ta.ayyun se guzar ja.egi
jab bhi us ke ruḳh-e-raushan ka ḳhayal aa.ega
chandni dil ke shabistan men utar ja.egi
har sitam karne se pahle ye zara soch bhi le
main jo bikhra to tiri zulf bikhar ja.egi
main ye samjhunga mujhe mil ga.i meraj-e-vafa
zindagi gar tiri yadon men guzar ja.egi
us taraf apni mohabbat ki kahani hogi
ye hava bu-e-vafa le ke jidhar ja.egi
kya ḳhabar thi ki ‘zafar’ ruuh miri duniya men
arzuon se kuchal kar kabhi mar ja.egi
Leave a Reply