Thikana hai kahin jaa.en kahan na-char baiThe hain
ijazat jab nahin dar ki pas-e-divar baiThe hain
ye matlab hai ki mahfil men mana.e aur man jaa.en
vo mere chheḌne ko ghair se bezar baiThe hain
ḳharidar aa rahe hain har taraf se naqd-e-jan le kar
vo yusuf ban ke bikne ko sar-e-bazar baiThe hain
achanak le na luun bosa ye khaTka un ke dil men hai
mire pahlu men baiThe hain magar hoshyar baiThe hain
tumhare ashiqon men be-qarari kya hi phaili hai
jidhar dekho jigar thame hue do-char baiThe hain
qayamat hai sitam murde pe bhi un ko gavara hai
mira lasha uThane ke liye aghyar baiThe hain
lab-e-bam aa ke dikhla vo tamasha tuur ka tum bhi
baḌe mauqe se dar par talib-e-didar baiThe hain
‘asar’ kyun-kar na janun us ke dar ko qibla-e-alam
usi janib ka.i ruḳh kafir o din-dar baiThe hain
Leave a Reply