Najma Shaheen Khosa
gai ruton ki rafaqaton men tumhen milungi
main chahaton ki riyazaton men tumhen milungi
tum apni manzil ke raston men jo dekh paao
to raston ki saubaton men tumhen milungi
nahin milungi kisi bhi vasl-ashna safar men
main hijr-mausam ki shiddaton men tumhen milungi
ki main ne chahat ko bhi aqida bana liya hai
agar mili to aqidaton men tumhen milungi
main janti huun ki tere idrak men nahin huun
magar vafa ki shabahaton men tumhen milungi
ho qaid tum apni zaat ke khol men agarche
bas ek khushbu huun dastakon men tumhen milungi
vo bint-e-havva ko go nazar se gira rahe hain
magar vo kahti hai rifaton men tumhen milungi
nahin hai ‘shahin’ khvab par e’tibar mujh ko
so zindagi ki haqiqaton men tumhen milungi
Leave a Reply