hai apne qatl ki dil-e-muztar ko ittilaa
gardan ko ittilaa na khanjar ko ittilaa
be-parda aaj niklega parda-nashin mira
kar de ye koi mahr-e-munavvar ko ittilaa
chhup-chhup ke ab jo niklo to maalum ho maza
kar di hai main ne aap ke ghar bhar ko ittilaa
bulbul na baaz aaiyo fariyad-o-ah se
kab tak na hogi qalb-e-gul-e-tar ko ittilaa
kis tarah kar diya dil-e-nazuk ko chuur chuur
is vaqia ki khaak hai patthar ko ittilaa
kya kaam inqalab ka kuchh bhi nahin yahan
daur-e-falak ke daura-e-saghar ko ittilaa
hat jaae ik taraf but-e-kafir ki raah se
de koi jald daud ke mahshar ko ittilaa
chalne bhi vo na paae the apne maqam se
pahle se ho gai dil-e-muztar ko ittilaa
main sakht-jan huun qasd kare dekh-bhal kar
pahle se ho gai hai ye khanjar ko ittilaa
‘parvin’ riyaz-e-khuld men kis kis ko jaam den
pahle se hai ye saqi-e-kausar ko ittilaa
Leave a Reply