vurud-e-jism tha jaan ka azaab hone laga
lahu men utra magar zahr aab hone laga
koi to aa.e suna.e naved-e-taza mujhe
uTho ki hashr se pahle hisab hone laga
use shubah hai jhulas ja.ega vo saath mire
mujhe ye ḳhauf ki main aftab hone laga
phir us ke samne chup ki kaḌi labon pe lagi
mira ye mansab-e-harf aab aab hone laga
main apne ḳhol men ḳhush bhi tha mutma.in bhi tha
main apni ḳhaak se nikla ḳharab hone laga
zarur mujh se ziyada hai us men kuchh ‘ḳhalid’
mira harif agar fatah-yab hone laga
Leave a Reply