Syed Ahmed Shameem
na jaane kaun hai kya hai kahan se aaya hai
vo mera ain hai ya ḳhvab hai ya dhoka hai
na dekh vaqt yuun mujh ko ye tera chehra hai
jo shaḳhs mujh men chhupa hai vo kitna saada hai
hava ke ghunghru hain sakit thaki thaki hai shaam
udasiyon ka har ik samt jaal phaila hai
faza men uḌte parindon ne par sameT liye
nuzul-e-sham hai aur rasta akela hai
tamam khel hua din Dhala chalo ab ghar
na jaane mujh men utarta ye dard kaisa hai
siyah raat ka panchhi hai pankh phaila.e
magar dilon men bahut duur tak ujala hai
use bhi saath na mauj-e-bala to le jaana
yahin pe mere sakun ka jazira Duuba hai
guzishta zaḳhmon ke Tanke masakte jaate hain
kisi ne duur bahut duur se pukara hai
‘shamim’ biiti ruton ki hai chandni phaili
fasil-e-shab se ḳhayalon ka chand ubhra hai
Leave a Reply