Nirmal Nadeem
tumhari yaad jab dil se mire lipTi ghazal kah di
taḌap kar jab kabhi ah-o-fughan uTThi ghazal kah di
shab-e-tanha.i ka deti hai jis ko naam ye duniya
mire siine pe jab aa kar kabhi baiThi ghazal kah di
kaha jab giit to phir giit sa mazmun le aaya
kahin jab bhi ghazal main ne ghazal jaisi ghazal kah di
bikhar kar chandni jab sahn men hansne lagi mujh par
ghamon par ḳhaak Daali aur main ne bhi ghazal kah di
kabhi jab Dagmaga.i zindagi ki naav tufan men
ada-e-mauj par main ne mohabbat ki ghazal kah di
ka.i aansu miri palkon se TuuTe be-zabani men
magar main ne kabhi jab bhi zaban kholi ghazal kah di
hazaron rang duniya ke sameTe sher men apne
kabhi jab gulshan-e-dil se uḌi titli ghazal kah di
mujhe bhi be-nishan ho kar hi is duniya se uThna hai
magar meri ana ne aaj phir koi ghazal kah di
bahut ḳhamosh tha dushman magar bola to ye bola
are kya baat hai nirmal-‘nadim’ achchhi ghazal kah di
Leave a Reply