Hum To Kahte The dam-E-Akhir Zara Susta Na Ja

Poet

ham to kahte the dam-e-akhir zara susta na ja

le, chale ham jaan se, mukhtar hai ab ja na ja

le dil-e-betab aata hai vo kar le arz-e-hal

dekhte hi us ki surat is qadar ghabra na ja

tang ho kar kis ada se vasl ki shab ko vo shokh

mujh se kahta tha ki he he is qadar lipta na ja

paas aana gar nahin manzur to aa aa ke shakl

az-rah-e-shokhi mujhe tu duur se dikhla na ja

jaun jaun kya kahe hai bas ladai ho chuki

pyaar se mere gale ab jan-e-jan lag ja na ja

kya saman rakhta hai vo mahfil se uthna yaar ka

aur isharon se mira kahna ki aa jana, na ja

kahte hain aata hai vo ai jaan bar-lab-amada

tu khuda ke vaste tuk aur bhi rah ja na ja

ruuth kar jab mujh se vo jaata hai to kar zabt-e-ah

pahle to kahta huun main ”tu jaan ab ja ya na jaa”

lek uth kar jab vo jaata hai to be-tabi se main

vuun hi kahta huun ”tire qurban jaun aa, na jaa”

lotta hai ‘jurat’-e-betab jaane se tire

yuun use tadpa ke tu ai shokh-e-be-parva, na ja