Mohammad Aazam
is be-ḳhudi men ruḳhsat ḳhuddari ho ga.i hai
mushkil hui jo asan dushvari ho ga.i hai
ik dagh-e-dil pe bhi ab apna nahin tasarruf
ye sab zamin goya sarkari ho ga.i hai
is bojh ki na puchho gaThri hai dil ye jis ko
jitna kiya hai halka kuchh bhari ho ga.i hai
shikva nahin sitam ka par ab ye dekhta huun
tum ko sitamgari ki bimari ho ga.i hai
koi talab na hasrat kuchh shauq hai na aadat
ab teri yaad meri lachari ho ga.i hai
lahje ki pairvi se tapta hai ‘mir’ koi
vo ‘mir’ ḳhatm jis par fankari ho ga.i hai
Leave a Reply