dayar-e-sharq ki abadiyon ke unche tilon par
kabhi aamon ke baghon men kabhi kheton ki mendon par
kabhi jhilon ke paani men kabhi basti ki galiyon men
kabhi kuchh niim uryan kam-sinon ki rang-raliyon men
sahar-dam jhutpute ke vaqt raton ke andhere men
kabhi melon men natak-toliyon men un ke dere men
taaqub men kabhi gum titliyon ke suuni rahon men
kabhi nanhe parindon ki nahufta khvab-gahon men
barhana paanv jalti ret yakh-basta havaon men
gurezan bastiyon se madrason se khanqahon men
kabhi ham-sin hasinon men bahut khush-kam o dil-rafta
kabhi pechan bagula saan kabhi jyuun chashm-e-khun-basta
hava men tairta khvabon men badal ki tarah udta
parindon ki tarah shakhon men chhup kar jhulta mudta
mujhe ik ladka avara-manush azad sailani
mujhe ik ladka jaise tund chashmon ka ravan paani
nazar aata hai yuun lagta hai jaise ye bala-e-jan
mira ham-zad hai har gaam par har mod par jaulan
ise ham-rah paata huun ye saae ki tarah mera
taaqub kar raha hai jaise main mafrur mulzim huun
ye mujh se puchhta hai akhtar-ul-iman tum hi ho
khuda-e-izz-o-jal ki nematon ka mo’tarif huun main
mujhe iqrar hai us ne zamin ko aise phailaya
ki jaise bistar-e-kam-khvab ho diba-o-makhmal ho
mujhe iqrar hai ye khema-e-aflak ka saaya
usi ki bakhshishen hain us ne suraj chand taron ko
fazaon men sanvara ik had-e-fasil muqarrar ki
chatanen chiir kar dariya nikale khak-e-asfal se
miri takhliq ki mujh ko jahan ki pasbani di
samundar motiyon mungon se kanen laal-o-gauhar se
havaen mast-kun khushbuon se maamur kar di hain
vo hakim qadir-e-mutlaq hai yakta aur daana hai
andhere ko ujale se juda karta hai khud ko main
agar pahchanta huun us ki rahmat aur sakhavat hai
usi ne khusravi di hai laimon ko mujhe nakbat
usi ne yava-goyon ko mira khazin banaya hai
tavangar hirzah-karon ko kiya daryuza-gar mujh ko
magar jab jab kisi ke samne daman pasara hai
ye ladka puchhta hai akhtar-ul-iman tum hi ho
maishat dusron ke haath men hai mere qabze men
juz ik zehn-e-rasa kuchh bhi nahin phir bhi magar mujh ko
kharosh-e-umr ke itmam tak ik baar uthana hai
anasir muntashir ho jaane nabzen duub jaane tak
nava-e-subh ho ya nala-e-shab kuchh bhi gaana hai
zafar-mandon ke aage rizq ki tahsil ki khatir
kabhi apna hi naghma un ka kah kar muskurana hai
vo khama-sozi shab-bedariyon ka jo natija ho
use ik khote sikke ki tarah sab ko dikhana hai
kabhi jab sochta huun apne baare men to kahta huun
ki tu ik aabla hai jis ko akhir phuut jaana hai
gharaz gardan huun bad-e-subh-gahi ki tarah lekin
sahar ki aarzu men shab ka daman thamta huun jab
ye ladka puchhta hai akhtar-ul-iman tum hi ho
ye ladka puchhta hai jab to main jhalla ke kahta huun
vo ashufta-mizaj andoh-parvar iztirab-asa
jise tum puchhte rahte ho kab ka mar chuka zalim
use khud apne hathon se kafan de kar farebon ka
isi ki arzuon ki lahad men phenk aaya huun
main us ladke se kahta huun vo shoala mar chuka jis ne
kabhi chaha tha ik khashak-e-alam phunk dalega
ye ladka muskurata hai ye ahista se kahta hai
ye kizb-o-iftira hai jhuut hai dekho main zinda huun
Leave a Reply