Zafar Kaleem
tab-e-raushan ko miri kuchh is tarah bhaa.i ghazal
jab bhi main tanha hua huun mujh ko yaad aa.i ghazal
jab bhi din Duuba hui fikr-e-suḳhan lahaq mujhe
shaam hote hi mire saghar men dar aa.i ghazal
yaad jab aa.e mujhe bichhḌe hue sathi mire
kanpte honTon ki har silvaT pe lahra.i ghazal
phuul si ankhon men angare liye phirta huun main
raat bhar sone kahan deti hai harja.i ghazal
rang sochon ke bikhar jaate hain ehsasat par
zehn men sha.er ke jab leti hai angḌa.i ghazal
na-gahan logon ne dil mera dikhaya to mujhe
yuun laga goya mire dukh banTne aa.i ghazal
mujh ko yaad aaya bahut vo na-murad-e-ishq ‘mir’
dil ke taron par ‘zafar’ mutrib ne jab gaa.i ghazal
Leave a Reply