Nooh Narvi
ham ishq men un makkaron ke be-fa.eda jalte bhunte hain
matlab jo hamara sun sun kar kahte hain ham uncha sunte hain
ham kuchh na kisi se kahte hain ham kuchh na kisi ki sunte hain
baiThe hue bazm-e-dilkash men bas dil ke TukḌe chunte hain
ulfat ke fasane par donon sar apna apna dhunte hain
ham sunte hain vo kahte hain ham kahte hain vo sunte hain
dil sa bhi koi hamdard nahin ham sa bhi koi dil-soz nahin
ham jalte hain to dil jalta hai dil bhunta hai to ham bhunte hain
taqdir ki gardish se na raha mahfuz hamara daman bhi
chunte the kabhi ham lala-o-gul ab kankar patthar chunte hain
aaj a.enge kal a.enge kal a.enge aaj a.enge
muddat se yahi vo kahte hain muddat se yahi ham sunte hain
aa.hen na kabhi munh se niklin naale na kabhi aa.e lab tak
ho zabt-e-tap-e-ulfat ka bura ham dil hi dil men bhunte hain
murghan-e-chaman bhi meri tarah divane hain lekin farq ye hai
main dasht men tinke chunta huun vo baagh men tinke chunte hain
ho bazm-e-tarab ya bazm-e-alam har majme.a men har mauqe.a par
ham sham.a ke sho.ale ki surat jalte bhi hain sar bhi dhunte hain
gulzar-e-jahan ki nairangi azar jinhen pahunchati hai
kanTon ko haTa kar daman men vo phuul chaman ke chunte hain
azar-o-sitam ke shikvon ka jhagḌa bhi chuke qissa bhi miTe
tum se jo kahe kuchh baat koi kah do use ham kab sunte hain
ghabra ke jo main un ke dar par deta huun kabhi avaz unhen
to kahte hain vo Thahro dam lo aate hain ab afshan chunte hain
ai ‘nuh’ kahan vo josh apna vo taur apne vo baat apni
tufan uThate the pahle ab hasrat se sar dhunte hain
Leave a Reply