ghairon ko bhala samjhe aur mujh ko bura jaana
samjhe bhi to kya samjhe jaana bhi to kya jaana
ik umr ke dukh paae sote hain faraghat se
ai ghalghala-e-mahshar ham ko na jaga jaana
mangun to sahi bosa par kya hai ilaaj is ka
yaan hont ka hil jaana vaan baat ka pa jaana
go umr basar us ki tahqiq men ki to bhi
mahiyyat-e-asli ko apni na zara jaana
kya yaar ki bad-ḳhui kya ghair ki bad-ḳhvahi
sarmaya-e-sad-afat hai dil hi ka aa jaana
kuchh arz-e-tamanna men shikva na sitam ka tha
main ne to kaha kya tha aur aap ne kya jaana
ik shab na use laae kuchh rang na dikhlae
ik shor-e-qayamat hi nalon ne utha jaana
chilman ka ulat jaana zahir ka bahana hai
un ko to bahar-surat ik jalva dikha jaana
hai haq ba-taraf us ke chahe sau sitam kar le
us ne dil-e-ashiq ko majbur-e-vafa jaana
anjam hua apna aghaz-e-mohabbat men
is shaghl ko jan-farsa aisa to na tha jaana
‘majruh’ hue maa.il kis afat-e-dauran par
ai hazrat-e-man tum ne dil bhi na laga jaana