dil jalva-gah-e-surat-e-janana ho gaya
shisha ye ek dam men pari-khana ho gaya
shab kyuun ki saltanat na kare taj-e-zar se shama
rashk-e-par-e-huma par-e-parvana ho gaya
kaifiyyaton se gardish-e-chashm-e-butan ki dil
shisha kabhi bana kabhi paimana ho gaya
tughyani-e-sarishk se apni bhi baad-e-qais
dariya ka paat daman-e-virana ho gaya
zanjir kyuun na us ki qadam-bos ho bhala
jo koi tere ishq men divana ho gaya
yaan tak kiya hai shohra-e-afaq ishq ne
qissa mira bhi khalq men afsana ho gaya
kya roiye kharabi-e-iqlim-e-dil ko dekh
ankhon ke dekhte hi to kya kya na ho gaya
saaqi kidhar phire hai tu tanha ba-rang-e-jam
tujh bin kharab in dinon mai-khana ho gaya
ankhon se tujh ko yaad main karta huun roz-o-shab
be-did mujh se kis liye begana ho gaya
bavar nahin to ashk-e-musalsal ko dekh le
dast-e-mizha men subha-e-sad-dana ho gaya
kahte hain us ke silsila-e-zulf men ‘nasir’
dil bhi murid ab sifat-e-shana ho gaya
Leave a Reply