ankhon men ik ḳhvab hai us ko yahin saja.unga
thoḌi zamin mili to ik din baagh laga.unga
shahr jo tum ye dekh rahe ho is men ka.i hain shahr
mere saath zara niklo to sair kara.unga
mere liye ye divar-o-dar jaise hain achchhe hain
is ghar ki ara.ish kar ke kise dikha.unga
saari duniya dekh rahi hai ḳhushiyon ke ambar
itni daulat mat de mujh ko kahan chhupa.unga
ye jo andhera phail raha hai jism-o-jan ke biich
aur ghanera ho jaa.e to diya jala.unga
Leave a Reply