fankar ke kaam aa.i na kuchh dida-vari bhi
karna paḌi shahzadon ko daryoza-gari bhi
ik silsila-e-dar-o-rasan phaila hua hai
minjumala ḳhataon ke hai sahab-nazari bhi
jin hathon ne phaḌe na kabhi jeb o gareban
un hathon se ho sakti nahin baḳhiya-gari bhi
un se to bahr taur har ik rahzan achchha
jo rahzani karte hain aur rahbari bhi
jab ilm ho surat-gar-e-mashshata-e-dozaḳh
firdaus hai aadam ke liye be-ḳhabari bhi
jab sar se guzar jaata hai talvar ka paani
sar thaam ke rah jaati hai bedad-gari bhi
‘vamiq’ tujhe yaron se jo begana bana de
ik saghar-e-be-kaif hai vo namvari bhi
Leave a Reply