Sufi
ḳhaak men milna tha aḳhir be-nishan hona hi tha
jalne vaale ke muqaddar men dhuan hona hi tha
ham na kahte the ki diide phuuT jaenge tire
raat din rone se ankhon ka ziyan hona hi tha
harf-e-sakit ban gaya taqti.a se ḳharij hua
is ghazal ki bazm se mujh ko nihan hona hi tha
kya hua jo bhuul baiThe hain sabhi qaari mujhe
ik na ik din mujh ko bhuli dastan hona hi tha
dhaar par chalna tha mujh ko kudna tha aag men
zindagi men ek din ye imtihan hona hi tha
rui ban kar uḌ gae parbat zamin hai zer-e-ab
ye karishma bhi to zer-e-asman hona hi tha
sabr kar ‘hasrat’ na ro ujḌe chaman ko dekh kar
didani manzar ko ankhon se nihan hona hi tha
Leave a Reply