Khudaya Hind Par Teri Inayat Ho Inayat Ho

khudaya hind par teri inayat ho inayat ho

baradar ko baradar se mohabbat ho mohabbat ho

na hindu ko musalman se adavat ho adavat ho

musalman ko na hindu se kudurat ho kudurat ho

tiri ai phuut jis ghar men iqamat ho iqamat ho

na kyuun be-intiha us men musibat ho musibat ho

yahi hai muddaa apna yahi hai iltija apni

vatan men rat-din yarab masarrat ho masarrat ho

sharaf is khaak ke putle ko hai insan hone ka

gharib-e-zar par jis ki inayat ho inayat ho

haqiqat men vahi hai bahra-var ishq-e-haqiqi se

urus-e-mulk se jis ko mohabbat ho mohabbat ho

ibadat naam hai us ka shariat hai laqab us ka

dil-o-jan se jo khilqat ki itaat ho itaat ho

jo ho hamdard khilqat ka vatan ka jo murabbi ho

ghazab hai zaat par us ki aziyyat ho aziyyat ho

dil-o-jan din-o-iman mulk-o-daulat par jo aadi hain

ilahi un ki ankhon men muravvat ho muravvat ho

saza-var-e-khitab-e-khizr vo insan hai duniya men

ki rah-gum-karda ki jis se hidayat ho hidayat ho

tujhe ai ‘barq’ ham samjhenge ahl-e-dil agar tujh se

dam-e-mushkil khalaeq ki ianat ho ianat ho