yahi hai ishq ki sar do magar duha.i na do
vafur-e-jazb se TuuTu magar suna.i na do
zamin se ek ta.alluq hai na-guzir magar
jo ho sake to ise rang-e-ashna.i na do
ye daur vo hai ki baiThe raho charagh-tale
sabhi ko bazm men dekho magar dikha.i na do
shahanshahi bhi jo dil ke evaz mile to na lo
faraz-e-koh ke badle bhi ye tara.i na do
javab-e-tohmat-e-ahl-e-zamana men ‘ḳhurshid’
yahi bahut hai ki lab si rakho safa.i na do
Leave a Reply