ḳhud pe jab dasht ki vahshat ko musallat karunga
is qadar ḳhaak uḌa.unga qayamat karunga
hijr ki raat miri jaan ko aa.i hui hai
bach gaya to main mohabbat ki mazammat karunga
jis ke saa.e men tujhe pahle pahal dekha tha
main isi peḌ ke niche tiri bai’at karunga
ab tire raaz sambhale nahin jaate mujh se
main kisi roz amanat men ḳhayanat karunga
teri yadon ne agar haath baTaya mera
apne TuuTe hue ḳhvabon ki marammat karunga
lailatul-qadr guzarunga kisi jangal men
nuur barsega daraḳhton ki imamat karunga
Leave a Reply