Ashfaq Husain
is zindagi men kuchh to tab-o-tab chahiye
ankhon ko roz ek naya ḳhvab chahiye
is shahr-e-be-misal ki galiyon ke saath saath
sar par rida-e-anjum-o-mahtab chahiye
ḳhamoshiyon ko izn-e-takallum jahan mile
vo bazm aur vo halqa-e-ahbab chahiye
lamha-ba-lamha lagte rahen zaḳhm be-shumar
halqa-ba-halqa ik naya girdab chahiye
dil men kisi ke gham ki kamanen tani rahen
chehra magar ba-halat-e-shadab chahiye
ai yad-e-yar abr ki surat kabhi baras
dariya-e-dil ko dard ka sailab chahiye
gahre samundaron ke safar se pata chala
jiina ba-shakl-e-mauj tah-e-ab chahiye
us shahryar-e-husn se kam-kam karo ḳhitab
‘ashfaq’ ishq men had-e-adab chahiye
Leave a Reply