Saleem Kausar
phir ji uthe hain jis se vo imkan tum nahin
ab jo bhi kar raha hai ye ehsan tum nahin
mujh men badal raha hai jo ik alam-e-khayal
us lamha-e-junun ke nigahban tum nahin
bujhte hue charagh ki lau jis ne tez ki
vo aur hi hava hai miri jaan tum nahin
phir yuun hua ki jaise girah khul gai koi
mushkil to bas yahi thi ki asan tum nahin
tum ne suni nahin hai sada-e-shikast-e-dil
ham jhelte rahe hain ye nuqsan tum nahin
tum se to bas nibah ki surat nikal padi
jis se hue the vaada o paiman tum nahin
khush-fahmiyon ki baat alag hai magar ye ghar
jis ke liye saja hai vo mehman tum nahin
ye alam-e-zuhur hai hijrat-zada ‘salim’
ham bhi dukhi hain sirf pareshan tum nahin
Leave a Reply