sozish-e-shola-e-furqat se fana ho jaana
maraz-e-gham ke liye hai ye dava ho jaana
sahl hai navak-e-mizhgan ka qaza ho jaana
ghamza-e-chashm ka asan hai jafa ho jaana
aarzu tujh se ye kahta huun shab-e-furqat men
khud dua hona kabhi dast-e-dua ho jaana
surat-e-khak-e-gulistan men na rahna ai dil
misl-e-bu daman-e-gulshan se juda ho jaana
daagh ban kar to raha daman-e-qatil pe magar
bu-e-khun bahr-e-khuda bu-e-vafa ho jaana
be-qarari se to rahat ho koi dam hasil
jism se jan-e-hazin jald juda ho jaana
shab-e-gham dil se ‘jamila’ ne yahi ro ke kaha
mil ke mitti men to naqsh-e-kaf-e-pa ho jaana