Bekhud Dehlvi
kyuun kah ke dil ka haal use bad-guman karun
ye raaz vo nahin hai jise main bayan karun
mujh ko ye zid ki vasl ka iqrar tum se luun
tum ko ye haT ki main na kabhi tujh se haan karun
ye kah rahi hai mujh se kisi ki nigah-e-sharm
fursat agar haya se mile shoḳhiyan karun
tu mujh ko aazma ke vafa-dariyon men dekh
main bevafa.iyon men tira imtihan karun
ukta gaya hai shar.a ki pabandiyon se ji
dil chahta hai bai.at-e-pir-e-mughan karun
‘beḳhud’ rafiq hai na koi ham-tariq hai
dil par jo kuchh guzarti hai kis se bayan karun
Leave a Reply