is na.e ghar meñ bhī har chiiz purānī kyoñ hai
gar ye sūrat hai to phir naql-e-makānī kyoñ hai
koī ḳhūbī bhī nahīñ naqs bhī lākhoñ mujh meñ
tū mire ishq meñ is darja divānī kyoñ hai
hijr kī baat karo mujh se kabhī ḳhalvat meñ
phir ye socho ki mirī aañkh meñ paanī kyoñ hai
lucknow shahr mirā shahd sā lahja samjhūñ
aap ke shahr meñ ye talḳh-zabānī kyoñ hai
jañg hai jahl se ‘afrañg’ qalam hī kaafī
kyā zarūrat hai ki shamshīr uThānī kyoñ hai