na jaane aaj kyon un ke labon par mera naam aaya
ye kaisa inqalab aaya salam aaya payam aaya
miri ḳhamoshiyan unvan bani hain kitne qisson ka
zaban ab kholna hogi ajab mushkil maqam aaya
jala.in ḳhud hi sham.en main ne aur ḳhud hi bujha Dalin
kabhi jab yaad mujh ko mera ḳhvab-e-na-tamam aaya
bigaḌe kaam duniya ke chala aflak sar karne
bashar ke sar men baiThe baiThe kya sauda-e-ḳham aaya
javani kahte hain laghzish hai lekin ma.arifat bhi hai
ka.i rahen nikalti hain jahan se vo maqam aaya
aziz-o-aqriba jitne the sab ishrat ke sathi the
bura jab vaqt aaya ‘tahira’ koi na kaam aaya
Leave a Reply