Rais Amrohvi
hijr se vasl is qadar bhari
sub.h se dil pe haul hai taari
apni uftad-e-tab.a kya kahiye!
vahi derina dil ki bimari
un ke chehre pe fat.h ke ba-vasf
infi.al-e-shikast hai taari
dil ka.i roz se dhaḌakta hai
hai kisi hadse ki tayyari
ba.az auqat azm-e-tark-e-vafa
ain min-jumla-e-vafadari
un ko taklif-e-naz deta huun
haa.e ye ḳhu-e-dost-azari
jan-leva sahi jarahat-e-ishq
aql ka zaḳhm hai bahut kaari
kaash mujh ko hisar men le le
mere ghar ki chahar-divari
Leave a Reply