Shahida Lateef
jugnu chand sitare le kar aa.i huun
tohfe kitne pyare le kar aa.i huun
in sunsan fazaon ki ḳhamoshi men
main avaz ke dhare le kar aa.i huun
zulmat-e-shab men kuchh to ho ummid-e-sahar
ashkon ke kuchh taare le kar aa.i huun
dekh bayaz-e-sher men kitni ḳhushbu hai
phuul main kitne saare le kar aa.i huun
‘shahida’ in tarik fazaon ki ḳhatir
ashaon ke taare le kar aa.i huun
Leave a Reply