avara huun rain-basera koi nahin mera
gali gali karta huun phera koi nahin mera
teri aas pe jiita tha main vo bhi ḳhatm hui
ab duniya men kaun hai mera koi nahin mera
tere baja.e kaun tha mera pahle bhi phir bhi
jab se saath chhuTa hai tera koi nahin mera
jab bhi chand se chehre dekhe bhiig ga.iin palken
phail gaya har samt andhera koi nahin mera
ajab nahin koi lahr uThe jo paar laga de naav
dard ki dhun men gaa.e machhera koi nahin mera
koi musafir hi ruk jaa.e pal do pal ke liye
muddat se viran hai Dera koi nahin mera
main ne qadr-e-tirgi-e-shab ab pahchani jab
guzar ga.i shab hua savera koi nahin mera
koi nahin hai jis ke hathon zahr piyun mar ja.un
biin baja.e jaa.e sapera koi nahin mera
Leave a Reply