makan se duur kahin la-makan men baiTh ga.i
badan ki aag tilismat-e-jan men baiTh ga.i
sulagti dhuup men jal kar faqir-e-shab tiri ḳhaak
kyuun ḳhan-qah-e-shab-e-be-karan main baiTh ga.i
kyuun aaj dil ke haram men namaz-e-gham na hui
kyuun ek chup si sada-e-azan men baiTh ga.i
hamari sub.h hujum-e-bala ki nazr hui
hamari shaam bhi dasht-e-guman main baiTh ga.i
kisi ka jism shikar-e-nahang-e-vaqt-e-ḳhizan
kisi ki saans faza-e-giran men baiTh ga.i
kahin safar ki risalat kahin thakan ki hadis
ye kashmakash bhi ‘rashidi’ dhuan men baiTh ga.i
Leave a Reply