zara nigah uThao ki gham ki raat kaTe
nazar nazar se milao ki gham ki raat kaTe
ab aa ga.e ho to mere qarib aa baiTho
dui ke naqsh miTao ki gham ki raat kaTe
shab-e-firaq hai sham-e-umid le aao
koi charagh jalao ki gham ki raat kaTe
kahan hain saqi-o-mutrib kahan hai pir-e-haram
kahan hain sab ye bulao ki gham ki raat kaTe
kahan ho mai-kade vaalo zara idhar aao
hamen bhi aaj pilao ki gham ki raat kaTe
nahin kuchh aur jo mumkin to yaar ‘shola’ ki
koi ghazal hi sunao ki gham ki raat kaTe
Leave a Reply