Apne Dil Ka Haal Na Kahna Kaisa Lagta Hai

Khalid Ahmad

apne dil ka haal na kahna kaisa lagta hai

tum ko apna chup chup rahna kaisa lagta hai

dukh ki bunden kya tum ko bhi khati rahti hain

ahista ahista Dhahna kaisa lagta hai

dard bhari raten jis dam halkore deti hain

dariyaon ke ruḳh par bahna kaisa lagta hai

main to apni dhun men chakraya sa phirta huun

tum ko apni mauj men rahna kaisa lagta hai

kya tum bhi sahil ki surat kaTte rahte ho

pal pal gham ki lahren sahna kaisa lagta hai

kya shamen tum ko bhi shab bhar be-kal rakhti hain

tum suraj ho tum ko lahna kaisa lagta hai

kya tum bhi galiyon men ghar ki vus.at paate ho

tum ko ghar se bahar rahna kaisa lagta hai

kam-ahang suron men tum kya gaate rahte ho

kuchh bhi na sunna kuchh bhi na kahna kaisa lagta hai

dard to sanson men baste hain kaun dikha.e tumhen

phulon par ḳhushbu ka gahna kaisa lagta hai