chup rahoge to zamana is se bad-tar aa.ega
aane vaala din liye hathon men ḳhanjar aa.ega
vo lahu pi kar baḌe andaz se kahta hai ye
gham ka har tufan us ke ghar ke bahar aa.ega
kya tamasha hai Dare sahme hue hain saare log
kya miri basti men koi zalim afsar aa.ega
lauT kar pichhe kabhi jaati nahin raftar-e-vaqt
zindagi ko ab miTane kaun ḳhud-sar aa.ega
main huun us bazm-e-hasin ka muddaton se muntazir
sab ke hathon men jahan labrez saghar aa.ega
tum isi vaadi men Thahro intizar us ka karo
vo tumhare paas ik paigham le kar aa.ega
kucha kucha se uThegi gham-zadon ki ek lahr
qarya qarya se bahi-ḳhvahon ka lashkar aa.ega
haath men mish.al liye har samt pahre par raho
raat ki chadar lapeTe hamla-avar aa.ega
dekh ai sayyah mere des ki ujḌi bahar
is se baḌh kar bhi koi ghamgin manzar aa.ega
meri surḳhi-e-tasavvur se hain kyuun naraz aap
kya hara peḌ aap tak bhi phuul le kar aa.ega
Dhal chali ‘dauran’ javani ki chamakti dopahar
ab bhala pahlu men mere kaun dilbar aa.ega
Leave a Reply