miri manzilen kahin aur hain mira rasta koi aur hai
haTo raah se miri ḳhizr-ji mira rahnuma koi aur hai
ye ajiib mantiq-e-ishq hai magar is men kuchh bhi na ban paḌe
mire dil men yaad kisi ki hai mujhe bhulta koi aur hai
miri jumbishen miri laghzishen mire bas men hongi na thiin na hain
main qayam karta huun zehan men mujhe sochta koi aur hai
tire husn tere jamal ka main divana yuun hi nahin hua
hai mujhe ḳhabar tire ruup men ye chhupa hua koi aur hai
nahin mujh ko tujh se koi gila hai alag tarah mira silsila
ki tire ḳhuda ka.i aur hain to mira ḳhuda koi aur hai
Leave a Reply