raat jhaTke se miri niind khuli TuuT ga.i
kanch ki chiiz thi Table se giri TuuT ga.i
sho.abada-baz ne gha.eb kiya manzar se mujhe
be-ghari chhuT ga.i aur chhaḌi TuuT ga.i
ḳhamushi naam ki ik shai hai mire siine men
tu mujhe haath laga dekh abhi TuuT ga.i
qahqaha da.imi tha mera mire paas raha
matami chup jo miri naam ki thi TuuT ga.i
saans divar hai jivan ki bahut ḳhasta mizaj
do minute Tek lage aur bhali TuuT ga.i
tum se is vaste manus nahin hota main
jo koi chiiz mujhe achchhi lagi TuuT ga.i
zindagi tohfa mili jis ko nahin sarf kiya
band Dabbe men na.i chiiz paḌi TuuT ga.i
ik zara ranj nahin apni halakat ka mujhe
dukh to ye hai tiri ḳhamosh ravi TuuT ga.i
Leave a Reply