faza-e-alam-e-qudsi men hai nashv-o-numa meri
mukafat-e-amal se duur hai bim-o-raja meri
shari.at hai azal se mohr-e-paiman-e-vafa meri
tariqat ḳhatim-e-ehram-e-taslim-o-raza meri
haqiqat hai savad-e-ḳhatir-e-be-mudda.a meri
harim-e-ma.arifat-da.a ma-kadar ḳhud na-safa meri
tiri zat-e-muqaddas hai mubarra shirk-e-ghairi se
ki nur-e-zat men saya-sifat hasti hai la meri
jamal-e-la-yazali shash-jihat se runuma dekha
bani a.ina-dar-e-husn chashm-e-haq-numa meri
kisi ka husn tur-afroz mahv-e-lan-tarani hai
dalil nisti hai hasti-e-ishq-o-fana meri
shuhud-e-haq hai ma-bain-e-ghuyub ik jalva-e-qudrat
hayat-e-javidan hai ibtida aur intiha meri
azal se mahv-e-didar-e-jamal-e-jalva-ara huun
nazar bil-ghair ho gar ho nazar men ma-siva meri
hadis-e-ishq bala-tar hai harf-o-saut se ‘sahir’
kahan main aur kahan taqdir-e-fikr-e-na-rasa meri
Leave a Reply