Ahmad Nadeem Qasmi

Hum Kabhi Ishq Ko Wahshat Nahin Banne Dete

ham kabhi ishq ko vahshat nahin banne dete

dil ki tahzib ko tohmat nahin banne dete

lab hi lab hai to kabhi aur kabhi chashm hi chashm

naqsh tere tiri surat nahin banne dete

ye sitare jo chamakte hain pas-e-abr-e-siyah

tere gham ko miri aadat nahin banne dete

un ki jannat bhi koi dasht-e-bala hi hogi

zinda rahne ko jo lazzat nahin banne dete

dost jo dard batate hain vo nadani men

dar-haqiqat miri sirat nahin banne dete

fikr fan ke liye lazim magar achchhe shaer

apne fan ko kabhi hikmat nahin banne dete

vo mohabbat ka taalluq ho ki nafrat ka ‘nadim’

rabte ziist ko khalvat nahin banne dete

Leave a Comment