ḳhushk a.ankhon se kahan tai ye masafat hogi
dil ko samjhaya tha ashkon ki zarurat hogi
rang mahlon ke hasin ḳhvab se bach kar rahna
hai ḳhabar garm ki ḳhvabon ki tijarat hogi
apne ghar ḳhud hi pasheman sa lauT aaya huun
main samajhta tha use meri zarurat hogi
meri tanha.i sukun dene lagi hai mujh ko
us se mat kahna sunega to nadamat hogi
ḳhushk lab pyaas ki tasvir ke andar rakh do
pyaas bujh ja.egi dariya ko bhi hairat hogi
silsila jalte charaghon ka chalo ḳhatm hua
tirgi ḳhush hai havaon ko bhi rahat hogi
kab sahar phuTegi koi tire zindanon se
kab riha.i miri ai shahr-e-aziyyat hogi
jaise mumkin ho in ashkon ko bachao ‘tariq’
shaam aa.i to charaghon ki zarurat hogi
Leave a Reply