maut ka gham nahin ḳhushiyon ke nazare hote
meri turbat pe agar phuul tumhare hote
mere mahbub ke qadmon ki pazira.i ko
ek dariya ke ka.i aur kinare hote
gar nikalti mire arman ki koi ganga
phir to sahraon ke kya ḳhuub nazare hote
bach nikalta bhala kaise ye safina mera
jo muḳhalif tire tufan ke dhare hote
vaqt le aaya ajab moḌ pe mujh ko varna
asman par meri qismat ke sitare hote
Leave a Reply