mo’taqid is baar shayad surḳh-ru hone ko hai
dost tha jo ab talak vo bhi adu hone ko hai
dar khule jaate hain gum-gashta makinon ki taraf
har kisi ko apni apni justuju hone ko hai
parbaton ki shakl men tabdil hota hai dhuan
kya koi aaseb mere ru-ba-ru hone ko hai
surḳhiyon men Dhalti jaati hai syahi dam-ba-dam
rafta rafta saara hi paani lahu hone ko hai
vahm ki ta.id karti hai havaon ki nami
pyaas ke maron pe zahir aabju hone ko hai
sa.i-e-la-hasil se bhi hasil hua hai vo mujhe
jis ki sab zinda-dilon ko aarzu hone ko hai
ik zamane ba.ad ‘rahat’ hosh men aaya huun main
ik zamane ba.ad ḳhud se guftugu hone ko hai
Leave a Reply